كل عام وانتم بخير......شويه حاجات

كل سنة وانتم طيبين..
رمضان ع الأبواب..
هلت الروايح..
يا تري ده عمر جاي..
ولا ده عمر رايح..
المهم..
السنة دي هنصوم..
حسب البيان والمرسوم..
ولا حد نظره حلو..
هيشوف الهلال..
عموماً..
أنا اشتريت أنبوبة بوتاجاز استبن..
وفوانيس صيني للعيال
ومراتي شطره مدبرة..
مخللة لمون وزتون..
وشايلة شوية حاجات ف شوال..
ودفعنا قسط المدرسة..
فاضل الكهرباء والصيانة والزبال..
شوف..
أول يومين نفطر ظفر..
ما هو كل سنة وانت طيب..
ده برضه احتفال..
ونكمل بعد كده بالفوازير..
والمسلسلات..
وأكيد الدوري العام شغال..
وتتقضي بإذن الله..
وتبقي زي الفل..
ويمشي الحال
وأهو يوم نفطر عند حماتي..
ويوم إحنا وحماتي..
نفطر عند عمي كمال..
علي فكرة بيتنا القديم..
جاله قرار إزالة..
تفتكر هايتزال..
يا عم ده جدك اللي بناه..
ولو كان خايب..
كان راح ف الزلزال..
إنما أنا عندي سؤال..
هو احنا دخلين علي رمضان..
ولا دي حرب وقتال..
ما هو لو العيش ف الفرن..
والزيت عند البقال..
والغاز مش زي ما سمعنا..
واتكتب واتقال..
والدروس الخصوصية جدعنة..
لله وللوطن..
واللحمة بريال..
كنا فكرنا ف حاجات أهم..
وعرفنا مصر راحت فين..
وارتاح البال..
لحسن بجد بجد..
غيابها طال..
كل سنة وإنتم طيبين..

هههههههههههههههههههههههه
ربنا يعينك وكل سنه وانت طيب

كل عام وانت اللى الله اقرب والى طاعته ادوم واى جنته ادنى واقرب

وعن النار ابعد ولفعل الخيرات اسبق ولسنة النبى الزم ولحب اتباعه اصدق .........

كل سنة وانت طيب واطال الله عمرك فى طاعته....

واسعدك بدخول جنته .......

وجعلك من عتقائه فى شهره ورمضان كريم.......

كل سنه وانت طيب يا صاحبى