الاحد القادم 14 /9 شبابيك على مائدة افطار دار ايتام الهناء

تأخرت كثيرا عن كتابه هذا الموضوع وترددت عندما كلفت بكتابته من الادارة احترت عن ماذا اكتب عن الحدوته من البدايه الى النهايه ام اعلن الخبر على طريقه اعلان ودعوة فقط
ولكن جلست اكتب ولا ادرى كيف ساتحدث ولنرى
كتبت من فترة ودعوت الى زيارة الى احدى دور الايتام يوم 27/7/2008 والحمد لله تمت الفكرة وتحولت الى واقع وسوف نقوم بأذن الله بالزيارة يوم الاحد 14/9/2008
دار ايتام الهناء للايتام كلهم اولاد وعددهم 76 طفل
ولقد مرت علينا خلال مرحله التجهيز عدة مواقف غيرت فى انا شخصيا
بدات الفكرة حين اعلنتها واتفقنا على ميعاد محدد للبدا فى التنفيذ اتت عدة افكار من عدة اشخاص وقام محمد جودة واحمد شومان
بعمل اهم دور فى الموضوع كله اذ بحثوا عن المكان المناسب وذهبوا اليه وواتوا لنا باحتياجتهم وحددوا موعدا للزيارة
وبدات مرحله التنفيذا صعوبه بالغه بل شعرت باستحاله التنفيذ
76 طفل لكل طفل بنطلون وقميص وكاوتش
اضف الى ذلك كميه من الاطعمه
16 طبق بيض 16 ك جبنه رومى 120 علبه نستو
25 ك جبنه 21 ك مربى 21 ك حلاوة
28 ك زيت عباد الشمس 28 ك زيت قليه
200 ك لبن بخيرة 6 ك طحينه 25 برطمان صلصه
15 زجاجه خل 80 فرخه 4 ك سمن بلدى
38 ك صابون سائل 1 كرتونه مسحوق غسيل
100 قطعه صابون تواليت وبكر مناديل
اضف الى ذلك كميه من الادويه وادوات مكتبيه للمدرسه
شعرنا بمسئوليه ومن الله علينا ووقف بجوارنا مواقف عدة اشعرتنا بعظمه ما نفعل واهميه
اولا اتفقنا على تجميع مبلغ مالى من كل واحد فينا على حسب مقدرته واتفقنا حث معارفنا واقاربنا على التبرع ايضا
من المواقف التى حدثت احدنا حدث والدة عن الامر وحدث زوج اخته بلا تردد بعثوا لنا بمبلغ محترم دة عادى جدا ولكن ماهزنى
تانى يوم قابلته وقام ادانى عشرة جنيه بيقولى دة بقيه الفلوس الى جوزى اختى بعتها انا نسيتها معايا ومن امبارح بتشوكنى
احد التجار فى الموسكى ذهبت اليه اعرض عليه الامر
سألنى سؤال غريب انت واصحابك مقدرتكم تدفعوا كام
قولتله كذا قال وانا هدفع اد ماهتدفعوا كلكم ودفعوهم فورا
وهكذا مواقف كثيرة مرت بنا
ولكن اعظم هذة المواقف ماحدث فى التوحيد والنور
ذهبنا لنحضر البناطيل والقمصان وشرحنا لهم الموقف تحمسوا
بعد عمل الفاتورة وتحضير المطلوب فوجئنا بأن المبلغ المطلوب يزيد عن المبلغ الموجود معنا بحوالى 600 جنيه
تحدثنا لمدير المحل احنا معانا قد كدة ممكن تخليهم معاك وتخلى الملابس واحنا هنيجى لحضرتك بكرة او بعدة وممكن نقدر نتصرف فى مبلغ اضافى وتركنا رقم تليفون احدنا رفضوا اخد الفلوس
ووافقوا على ترك الملابس كما هى خرجنا نجر اذيال الخيبه وفقدان الامل وانتابتنى انا شخصيا حاله من اليأس
وهنا قال الله كلمته بعث لنا برسالته انتم على الطريق الصحيح استمروا لم نكد نكمل 5 دقائق بعد ان تركنا المحل جأء احدنا تليفون ان عودوا للمحل لا ندرى مأذا حدث عدنا
اذ بمدير المحل يحدثنا لقد كلمت الادارة وشرحت لهم ووافقوا على خصم مايقارب ما 350 جنيه من المبلغ وقولنا كدة هيبقى فاضل حوالى 250 جنيه قام احدهم بالمرور على العاملين فى المحل
وجمع منهم المبلغ المتبقى امامنا ونحن فى حاله من الذهول لا ندرى ماذا يحدث اخدنا الملابس وانصرفنا والله اقسم انه تكاد تكون اعيننا قد دمعت من هول الموقف وتذكرت قول الرسول (ص)
(الخير فى وفى امتى الى يوم الدين) صدقت يارسول الله
عذرا لقد اطالت عليكم كثيرا تبقى لنا شئ واحد
لقد احضرنا نحن 76 بنطلون +76 قميص + الادوات المكتبيه
كشاكيل واقلام والحاجات دة + الادويه + المناديل كميه كبيرة تبرع
وعدد 3 كورة للاطفال
باقى الحاجات التى لم نستطيع احضارها مكتوبه عندكم هذة هى مقدرتنا وما من الله علينا به فمن اراد الذهاب فراد او جماعه
فليحضرا مما لم نستطيع احضارة ومن يريد العنوان
دار ايتام الهناء للاولاد بجوار حديقه الفسطاط الملك الصالح
جزاكم الله خيرا ووفقكم لما فيه الخير امين

عدد الرسائل : 2 تاريخ التسجيل : 24/06/2008

جزاكم الله خيرا وربنا يجعله فى ميزان حسناتكم
ووفقكم الله بجد انا سعيدة وفرحانه لما قرايت الفكرة دة
والله الدنيا لسه بخير

تسلم ايدك يايوسف وتسلم ذاكرتك
وفعلا مواقف لا تنسى وربنا يتمها على خير انشاء الله
وادعوا الله الا تنقطع هذه العاده

قال تعالى

( خذ من أموالهم صدقة تطهرهم وتزكيهم بها وصل عليهم ان صلاتك سكن لهم ) صدق الله العظيم

اللهم هذا العمل خالصا لوجهك الكريم اللهم تقبله منا اللهم ارزق كل من قام على هذا العمل بالمغفره والرحمه وتقبل منا انك انت السميع العليم اللهم امين

الحمد لله
هو طبعا اللى ليه الفضل الاول فى اللى حصل ده
وبجد احنا كلنا فرحانين لاننا حاسسين اننا بنساعد ناس محتاجين المساعده فعلا
ولما لقينا تجاوب من ناس كتير عرفنا ان الدنيا لسه بخير
الدنيا لسه فيها ناس طيبين
اقولكم انا على موقف تانى
احنا الحمد لله جبنا حاجات كتير زى ما قال يوسف ومن ضمنها ادوات المدارس
الناهرده كنا على القهوه
واحد فينا قال يا جماعه طب ماتيجى نجيب جلاد وتيكت للكراريس بالمره
طبعا الفلوس اللى معانا خلصت كلها
قلنا كل واحد يطلع الفكه اللى فى جيبه
اول ما لمينا من بعض لمينا مبلغ صغير
وقلنا خلاص حلو قوى كده
ومفيش 10 دقايق لقيت المبلغ بقى 4 اضعاف
انا سالت ازاى يا جماعه المبلغ تضعاف بالسرعه دى
قالوا الاقهوجيه لقونا بنعمل خير لموا من بعضهم علشان يساهموا
واللى مكنش معاه فلوس قال هيجيب فلوس بكره
وبعد ما كنا ناويين نجيب جلاد و تيكيت بكده هنجيب كمان جوايز للاطفال
هنعمل مسابقات ليهم وهنجيبلهم جوايز
الحمد لله الناس كلها بتحب الخير وبتحب تعمله
يارب دايما
ياريت اللى يقدر ياخد اهله من البنات ويروح او حتى يقول لحد على الفكره دى
احنا كتبنا ايه اللى ناقص للدار ولسه معرفناش نغطيه
لو فى حد عنده المقدره يروح ويغطى باقى الاحتياجات ياريت يروح
يا جماعه الدار دى اطفال ايتام اولاد
وفى فرع تانى للدار فى العباسيه فيها بنات ايتام
ياريت يا يوسف تكتب العناوين بالتفصيل وارقام التليفونات

جزاكم الله خيرا واثقله فى ميزان حسناتكم

والله انتوا شباب جدعان جداااا
واحنا اكيد فخورين بأن رجالة المنتدى كده
جزاكوا الله كل خير

بفضل الله قدرنا ان احنا نساعد اطفال محتاجين فعلاً لمساعدتنا

انا بشكرالله علي فضله علينا
وبشكر كل اللي وقف معانا وماترددش لحظه في انه يشارك

وان شاء الله تبقي عاده ماتتقطعش ابداً

والحمد والشكر لله

عدد الرسائل : 7 العمر : 33 تاريخ التسجيل : 29/09/2008

بجد بسم الله ماشاء الله عليكم ربنا يكرمكم