بقول لها..
ما تيجي نهزر
نجري ونلعب
ونكسر كل الحاجات..
ونجيب م اللي فات..
يومين حلوين...
قالتلي والنبي إنت فايق ورايق..
قولتلها طب وليه نتضايق..
إحنا لسه صغيرين..
وأكبر عيالنا..
يا دوب تسع سنين..
يعني لو بنحكم مصر..
تبقي يا دوب لفة ونص..
مش عشرين..
- وطي صوتك البت بتذاكر..
والواد ماصدقت إنه نام...
إنما إيه اللي صحي ف قلبك..
من تاني الغرام..
قولتلها جوايا كلمتين غزل..
قالتلي والنبي إنت عسل..
بس هي الظروف..
- مالها الظروف..
فاكرة لما كنتي
بتحوشي من المصروف..
جبتيلي ورد ف عيد ميلادي..
- وجبتلك بلوفر صوف..
- وجبتليلي بلوفر صوف..
- فاكر لما بوستني
وإحنا لسه مخطوبين وأبويا لاحظ
يالهوي كنت هموت م الكسوف..
- فاكرة أول مرة قلت لك بحبك
وشك احمرّ
- إنت اللي وشك كان مخطوف..
- مش إنتي كنتي بترسمي زمان..
- وإنت كمان كنت بتكتب شعر..
- هو احنا بطلنا نحس..
- إحنا بطلنا نشوف..
وطلعنا اللب والسوداني..
وفتحنا التليفزيون..
وسكتنا تاني..
ولازال السبب..
غير معروف..
غير معروف
الخميس يوليو 07, 2011 12:57 am من طرف الله ربى والاسلام دينى
